華華之前提過，做埋今個月嘅機管局主席羅康瑞十分睇重機管局嘅地產項目，仲開個新位專搞呢瓣，噚日佢哋終於宣佈，從新鴻基地產（016）挖角，請來區浩章做物業發展執行總監，下周一生效。
區浩章喺新地工作超過20年，主要喺幕後工作，傳媒對佢冇乜認識，佢走之前擔任新地（中國）董事同埋新地項目總監。佢加入機管局之後，將會主管機管局嘅長遠資產與商業設施設計，仲有機場嘅土地用途與物業事務，直接向機管局行政總裁林天福滙報職務。
機管局現有6位執行總監，分別負責財務、機場運行、企業發展、人力資源、建築工程，同埋商務，商務總監基本上就係負責機場嘅商業地產與零售租務。聞說羅康瑞想搵一個真係識做地產發展嘅人，於是就開多個新位，𠵱家成功向新地挖角。