特區政府前日突然公佈會將今年9月3日、亦即係抗日戰爭勝利紀念日變成全民皆享嘅法定有薪假期，雖然只係一日咁多，但有假，你放唔放先？由於呢次假期屬法定有薪假，所以要落實嘅話，就需要立法會通過。有官場中人同花生友分享，從今次特區政府為假期立法嘅高效率時間表體會到，有民意支持嘅時候，議會又點會阻撓。
要落實今次70年一遇嘅假期，勞工顧問委員會今日開會討論，今個月19號就輪到立法會人力事務委員會傾，之後相關嘅條例草案會喺今個月22號刊憲、27號大會上首讀，預計不遲於7月8日嘅立法會大會上恢復二讀辯論，以便三讀通過。
預計7月內通過
官場中人同花生友講起，佢話屈指一算，由前日公佈有呢日特別嘅假期，到條草案預計7月內通過，加埋都唔夠兩個月，咁短時間就可以通過一條法例，呢個效率真係前所未有。佢仲笑笑口同花生友講，又唔見成立創新及科技局可以咁快。
其實道理好簡單啫，放假呢回事，民意非常清晰、目標亦相當明確。至於最有可能持反對意見嘅商界議員亦有佢哋嘅下台階，就係今次假期只係一次性，因此先會促成近年少有地議會內不分左中右，各個黨派都唔反對嘅情況。咁要通過仲冇乜難度可言？官場中人結論係，今次件事正好示範，喺目前爭拗多嘅政治環境下，溝通好重要嘅。
花生友