唱作人倫永亮和潘源良相識多年，潘Sir寫的《總有你鼓勵》唱紅了倫永亮，他將為下月潘Sir的作品展擔任音樂總監，日前倫永亮在觀塘接受專訪說：「我眼中嘅潘源良好有深度，六成感性，四成理性，每次我寫好隻歌，知道係講情講愛，一定搵老潘填詞，佢寫嘅情歌真係夭心夭肺，好似《情人知己》、《容易受傷的女人》、《憑着愛》，睇到個人心路歷程真係經歷好多，雖然識咗佢20幾年，我完全唔知佢以前好多女朋友！」
愛情多面睇
倫永亮最愛潘Sir的金曲，是寫給蘇芮《愛過就是完全》，他說：「你聽完首歌會喊，阿潘好如實將愛情真面目透過歌詞表露，失戀就失戀，唔需要自殺，因為生命不停流轉，應該珍惜曾經擁有，呢個係阿潘成日想講嘅愛情真諦。佢跟其他填詞人最大分別，一定係情字，因為佢寫情係好現實，寫到內心背後意義，呢樣係佢拿手好戲。」當年倫永亮為林憶蓮做監製，搵潘Sir幫憶蓮寫了很多歌，他說：「我曾經質疑過佢，《愛過就是完全》咁灑脫，但《還有》就唔捨得，佢話呢個咪多面睇，你失戀係咁，人哋失戀未必係咁。」
攝影：仇志德
《總有你鼓勵》倫永亮、李國祥
「恨愁用歌聲代替」
解讀：潘源良曾為不少合唱歌填詞，男男卻是少數。《總有你鼓勵》講述兩名失戀男子在酒吧偶遇並傾吐心事，惺惺相惜而建立友誼。當然亦有人過份解讀成中途轉「基」的另類歌。