先同大家介紹一個內地潮語「栓狗冠」，佢嘅全寫係「喺教練席栓條狗都能夠贏冠軍」，近年經常要嚟形容巴塞隆拿同拜仁慕尼黑。有啲網民會認為，巴塞同拜仁球員超勁，就算冇教練、甚至搵隻狗坐喺度都可以贏冠軍。
美斯屈晒機，喺球壇簡直係一個bug。正因為美斯太勁，所以巴塞隆拿最近成績好好，就嚟攞西甲聯賽冠軍，歐聯亦入埋決賽，但好少人讚教練安歷基（右），覺得佢只係抱球王美斯嘅大腿，甚至話巴塞「栓狗冠」，安帥只不過係靠巴塞多年來嘅戰術體系攞冠軍。小弟唔否認呢隊巴塞仲有當年哥迪奧拿嘅影子，依然係靠傳控搵食，但不可不提安歷基今季所做嘅微調。佢用拿傑迪錫頂沙維，表面上係位對位，但戰術上係一個大變。
拿傑迪錫嘅短傳、閱讀球賽能力差過沙維，但佢勝在後生，效率高，防守又夠搏命，識去兩閘補位，同時長傳亦有番咁上下。因此，安歷基嘅巴塞冇以前咁執着控球，更樂意畀長傳，就算比以前更容易失控球都冇問題，因為拿傑迪錫為首嘅中場有活力，搶得番。
至於中場失去咗嘅組織力，就由前鋒幫手補番，美斯、蘇亞雷斯同尼馬除咗射門掂外，佢哋亦有帶波組織嘅能力，其中美斯有時會返到好後攞波。安歷基今季加快巴塞進攻節奏，將控球權更直接送到前鋒腳下，同善用拿傑迪錫嘅特點，順利解決咗沙維接班人嘅問題。文：咖喱