立法會主席曾鈺成日理萬機，唔知係唔係因為咁，所以好鬼趕，仲喺噚日被市民話見到佢嘅座駕懷疑超速。有市民向八方報料，話噚日朝早7點幾，見到曾鈺成由司機揸車，由沙田經大老山隧道去觀塘，再經東隧返立法會，其間主席嘅座駕喺觀塘繞道位置懷疑超速。
報料者話喎，嗰度限制每小時70公里，但佢一路尾隨主席嘅座駕，相信佢架車時速超過100公里。一路上主席坐喺後座，一時玩手機，一時周圍望。報料者以身試法去追主席架車，用手機拍低當時情況（圖）。
運輸署成日都話，超速駕駛係嚴重罪行，亦係交通意外嘅主要成因之一。根據法例，如果超速駕駛程度比速度限制高出超過每小時30公里，但唔多過每小時45公里，一經定罪定額罰款600蚊，仲會被扣5分。曾鈺成透過發言人回應，沒有留意當時情況。