巴塞隆拿叫糊三冠王，大家當然將首功畀「MSN」三叉戟，特別係前鋒美斯；三子今季已經累積過百入球，破晒隊史，但其實巴塞今季更成功係防守，西甲累積失球最少，證明一支冠軍球隊，除咗進攻，防守都好重要。
車路士拎到英超冠軍，曼城領隊比歷連尼、甚至好多球迷都批評佢哋成日泊大巴，戰術沉悶；領隊摩連奴都出嚟反駁，講防守一啲都唔容易。坦白講，車仔啲波係就係悶啲，但要多場大戰都零封對手，絕對唔簡單。如果泊大巴就拎到冠軍，點解比歷連尼又唔泊？如果泊大巴就有好成績，昆士柏流浪又唔泊，搞到要降班。
正所謂有危自有機，巴塞被國際足協罰禁止買人，今季季初把握最後機會狂掃貨，但唔似曼聯、利物浦亂石投林，新兵整體好對辦，前鋒蘇亞雷斯當然最勁，入波助攻都多，兩大門將哥迪奧巴禾、達史特根都穩陣，小弟個人就覺得克羅地亞中場拿傑迪錫（左）係無名英雄。
賣法比加斯換拿傑迪錫，巴塞原本呢一着都幾冒險，畢竟法比仔出身青訓，熟悉球隊運作；拿傑迪錫就由西維爾加盟，要啲適應時間。拿傑迪錫波底唔及得上恩尼斯達同沙維，但勝在效率高，屬全能中場可攻可守，特別季中布斯基斯狀態不濟，馬斯真蘭奴要打番中堅時，就靠拿傑迪錫頂住中場。而且同車仔泊大巴唔同，巴塞嘅防守線由對手後半場開始，一失球就開始向對手後防逼搶，少啲鬥心都唔得，拿傑迪錫就做到呢點。隨住沙維將離隊，恩尼斯達亦開始淡出，巴塞最具影響力中場，相信都係佢。
文：牽牛