任期仲有約兩年嘅特首梁振英，由佢做一家之主嘅特首辦，招聘家務員嘅次數多到數唔晒，八方最近又見到CY請家廚，呢個除咗係公務員筍位，月薪仲高達23,210蚊，即使唔升職，同一職位可以升到頂薪26,895蚊，加埋每年一度嘅公務員加薪，真係好唔錯，唔知多唔多人想入禮賓府做一家之「煮」？
之所以話人工高，皆因八方喺勞工處網頁搵過廚師嘅工作，如果要搵一份高過做梁振英家廚嘅工，得兩份咋，但計埋特首辦家廚係公務員「鐵飯碗」、有約滿酬金同房屋津貼呢啲着數，都咪話唔吸引。
設計餐單 負責買料
咁高人工，要求當然唔低，包括要做過9年工作經驗，喺大戶家庭、大型飲食機構、酒店做過中或西廚，如果兼具其他地方菜式知識、烹飪經驗就更加好。申請人要操流利廣東話同簡單英語，要識讀識寫中英文，識電腦文書處理就優先考慮。職責講明要為梁振英同佢屋企人烹調食物、設計餐單同負責買料，而平日除咗喺禮賓府煮，有時都要去粉嶺別墅工作。
禮賓府前家廚鍾建良曾經透露，CY嘅兩個囡囡、即係包括齊昕，都鍾意食麵，唔知識得「煮個麵你食」、又或者識整對呢個家庭別具意思嘅「龍蝦」，會唔會有分加？至於到底係咪一如傳聞要稱呼CY嘅仔女做「大少、小姐」？個招聘廣告就冇呢個入職要求喎，留待應徵者自行發掘咯。
李八方
mailto:[email protected]