第五場四班千二米，爆到阿媽都唔認得，三大高手雷神、韋達同柏寶，分別騎三大熱門「大勇士」、「飛霞」同「快人一步」，全部三甲不入，反為51倍東廐「一定旺」同20倍文廐「果然醒」跑落有前有後，四歲馬「一定旺」重配郭能拉士追過「果然醒」勝出，人馬合作兩戰贏晒。
「一定旺」組合之郭能、告東尼，繼憑「將男」勇奪女皇盃後再有佳作，而「果然醒」久休復出初次跑谷草放返嚟斷唔晒，雖然頂唔住頭馬衝刺，但卻擋住後面幾匹追兵，影相氣走季軍「歡笑多多」，同「一定旺」構成4,796元巨型大冷Q，第四名係中檔姍姍來遲之「飛霞」，四重彩派十六萬四千幾。
「一定旺」上仗包尾輸25.5馬位，今仗忽然神勇變第一，馬主何壽南賽後自稱中得唔應，僅投注100元獨贏支持愛駒，皆因自己賽前信心唔大，如今大冷贏馬屬意外收穫，有頭馬拉於願足矣！