內地創業板炒到飛起，搞網上教學嘅全通教育，市盈率過千倍，令人側目。港股同業網龍（777）終於起動，爆升兩成後市盈率不過77倍，一折有找，有排玩！可以預期，水向低流現象將繼續蔓延，買定平股等炒肯定有so，今日推介內地手機設備股丘鈦（1478），正宗蔗渣價錢燒鵝味道。
「玩嘢咩，大陸智能手機出貨6年首次下跌喎，而家先推介？」科技日新月異，幾年前iPhone面世時，你會唔會諗到有Apple Watch或Google Glass？你睇吓蘋果股價，回氣後照舊破頂，就知科技係無極限嘅，再講，強國人複製能力有幾強，大家心中有數，有平貨唔買等幾時？
時間無多，即數丘鈦三大賣點︰1.估值平。丘鈦產銷智能手機鏡頭，最新PE 8.4倍，PB 3倍，同業舜宇光學（2382）PE 26倍，PB 5.9倍，誰平誰貴一目了然。2.業績佳。丘鈦全年盈利增長兩成，毛利率升至16.8%，反觀舜宇盈利雖升25%，但毛利率反跌至15.3%，買當頭起必揀丘鈦。3.收乾貨。丘鈦舊年上市後即潛水，靜足一年後及至大時代始重上水面，欠實力散戶全被震走，貨源盡落強者手中，加上大股東揸75%貨，乾涸到暈，要舞上按個掣就得。
唔好忘記，丘鈦市值只得奀豬34億，啱晒強國人口味，噚日仲升呢做MSCI中國小型股指數，呢轉仲唔炒到破頂？
唐牛
https://www.facebook.com/tongcow88