反喇反喇，759阿信屋好大膽，竟然大賣689龍蝦，如果喺北韓，可能會被高射炮處決！
費清同好多網友一樣，經常上759阿信屋fb，除咗睇優惠，最重要係fb admin不時都有驚喜畀大家。噚日就有新搞作，「加拿大龍蝦熟凍400克，街坊價$98.8，超抵價$68.9」（圖）。就咁聽以為只係一般宣傳，但只要一睇張海報，大大個數字689，再加埋紅卜卜龍蝦相，不期然會諗起特首同佢夫人。
#網民讚爽
識睇一定睇留言，Tony Kai Tung Leung警告阿信屋「小心比（俾）人封鋪（舖）」（費清話直情要小心被處決）。Kai Wa Kwong就話「用68.9買起隻龍蝦，爽！」Tommy Ping就驚死大家唔明，po咗《蘋果》八方嘅梁太經典人形龍蝦照。
費清打電話畀阿信屋老細林偉駿關心吓，冇人聽。（應該冇事嘅，香港仲未變北韓……啩？！）
言歸正傳，好多人以為龍蝦製法複雜，其實唔係，阿信屋話龍蝦已熟，用焗爐校200度焗5分鐘左右，焗太耐小心變韌。而且，蝦肉已帶有淡淡海水鹹味，唔使再落鹽調味，用少少黑胡椒已經可以帶出海鮮嘅天然甜味。
＃要生計，也要生活 ＃毋忘初衷
費清