周日(17日)新加坡克蘭芝馬場，將上演2000米新航國際盃及1200米KrisFlyer國際短途錦標兩項一級賽，係當地馬壇全季最重要盛事，一如香港馬會每逢國際性大賽，都會搞好多節目造勢，新加坡馬會亦唔例外，而近年新航國際盃前重頭活動，就係TURF BELLES選美比賽，由14位美女穿上唔同嘅露腰貼身綵衣，代表新航國際盃每一匹戰馬，進行眾多宣傳活動，仲接受公眾投票，從中揀選佢哋嘅女神。近日呢班TURF BELLES就喺新加坡各地落區，幫自己拉票之餘，亦為周日兩場大賽造勢，唔知香港馬會會否效法，搞番個香港馬女郎大賽呢？
講番賽事，今屆有五匹港馬遠征星洲。短途的一場老實講「天久」雖係兩屆KrisFlyer國際短途錦冠軍，但老馬走緊下坡，而「好好計」草地威力差一截，港隊爭勝希望始終係當打嘅「友瑩格」。
至於新航國際盃，「軍事出擊」有傷患及體重偏低陰影，戰鬥力難與全盛時媲美；反而「花月春風」今季跑得少，目前體力充沛，上仗冠軍一哩賽跑第三表現有改善，狀態正邁向巔峰，話唔定真係可以衛冕呢項錦標。