光纖之父高錕教授患腦退化症12年，太太高黃美芸不離不棄，信守相伴一生嘅承諾。佢噚日甜絲絲咁話，舊時拍拖高錕要趁冬天時搵機會拖佢手，50年後，就到佢拖實對方落街散步。最近高錕慈善基金同國際成就計劃香港部合辦「牽手．承諾」主題展，邀請歌手杜德偉、電視監製戴尚安同珠寶設計師李詩穎等參與創作，聽日一連三日喺港鐵九龍站環球貿易廣場天際100觀景台展出。場內有售限量紀念集，每本100蚊，收益全數撥捐高錕慈善基金。
此外，今次計劃邀請中學生根據高錕夫婦嘅故事創作，優異作品亦喺展覽展出。元朗商會中學嘅鄧慧欣同賴凱莉畫咗一對緊緊握住嘅手，代表感情雖受年華洗禮，仍然堅定不移。展覽唔使額外收費，但首先要畀天際100入場費，每位168蚊。