人稱「煲呔」嘅前行政長官曾蔭權喺卸任之後行蹤隱秘，傳媒要影到佢都幾難，但近日就有消息話佢即將搬去元朗葡萄園獨立屋新居，每月仲要85,000蚊月租㖭。八方噚日就去實地了解過，發現有部政府車同懷疑係G4特工出入，而煲呔胞妹好友黃書雅嘅一部七人車亦有到場，相信係幫手打點新居。
有人入屋即拉窗簾
煲呔肯出85,000蚊租葡萄園獨立屋，間屋一定唔嘢少。根據資料，屋主係河南省政協委員、黃大仙區議員丁志威嘅，有成4,000幾呎，八方睇落應該夠唔捨得掉舊衫嘅曾太曾鮑笑薇，放晒佢嘅衫，至於外面個面積千幾呎嘅私人花園，唔知有冇魚池？事關煲呔最愛養錦鯉，八方聽聞煲呔當年連部iPad都裝咗模擬養錦鯉App，見唔到真魚都要見假魚，冇個魚池點搞？
煲呔搬竇消息曝咗光，噚日屋苑嘅保安都勁緊張，戒備森嚴，見八方喺度影相，仲走出嚟不斷耍手擰頭。朝早10點幾，一部掛AM車牌嘅政府車到場，懷疑係煲呔嘅貼身G4落車，但就未見煲呔出現。之後又有一部白色七人車到場，資料顯示呢部七人車係一間公司持有，登記董事包括煲呔胞妹曾璟璇同好友黃書雅。之後八方就見到有人走入屋裏面，仲好機警咁即刻拉上窗簾，以免俾外界影到裏面。八方噚日都打電話問過丁議員想了解吓，但佢助手就幫佢推咗。
李八方
mailto:[email protected]