央媽減息賀母親節，中港股市反應有別，港股全不領情，連日陰燭。今次係半年內第三次減息，減息背後係經濟唔掂；趕在周日出手，揭示本周出爐經濟數據差勁。果然，昨日公佈的工業增加值、消費品零售總額、城鎮固定資產投資都差過預期；連同日前公佈的進出口、CPI、PPI、PMI數據疲弱，睇嚟今季有機會再鬆手。
泰昇有升有息抵玩
港股經過上周顯著調整後，本周繼續整固，昨收報27249，未能收復保歷加通道中軸，加上部份泊港熱錢流走，近日成交由早前動輒2,000幾億元回落至千幾億元，缺乏動力，就算再跌空間唔大，調整似未完成，短期或下試27000關。現時市況，宜分注收集，穩陣之選係行業龍頭及具國策支持股份。近排半新股落鑊，但唔係個個啱玩，要吸取恩達（1480）的教訓。
昨公佈數據並非一面倒咁差，當中全國商品房銷售面積和銷售額跌幅收窄，內房現回暖迹象；加上減息利好內房，望多兩眼呢個板塊，留意到一隻半內房股泰昇（687），屬於有升有息，可攻可守一類。
泰昇係變身股，現時大股東係美國著名投資基金黑石，持股高達75%；第二大股東係加拿大一個退休基金，持股8.35%。泰昇在香港從事以地基打樁為主的建造業；在內地則從事物業發展和投資，主要在一二線城市。以控股股東黑石的來頭，足以為泰昇取得較低息的融資。
截至舊年9月底止半年，泰昇多賺逾倍，中期息0.05元；下半年盈利應不少於上半年，全年可保持逾倍利錢。由於係淨現金公司，末期息料不少於上年度的0.1元，即全年共派息0.15元。年結日為3月底的公司，一般6月公佈全年業績。泰昇2月時宣佈賣出上海一項投資物業，套現3.4億元人民幣，賺1.39億元，估計趕唔切入賬，但就為新年度的盈利和派息打定底。
泰昇今年首季在2.4至2.8元橫行，皆因市場對內房仍有戒心；4月與牛共舞，高見2.98元後整固，昨日發力飆升近14%，收報3.1元。現時內房回暖，現價市盈率10倍，股息率近5厘，係唔錯的收息股。年幾兩年前，黑石以每股2.86元，溢價收購泰昇，引起市場無限憧憬，包括黑石會否將大中華業務注入？會否拉攏其股東之一的中投入股？黑石至今未有動作，想像空間無限。
話時話，中投於2007年成立時，目的之一係將國內過剩的流動性導向海外，特別針對房地產；但中投的第一單黑石，卻在內地多個城市投資房地產，都幾弔詭。
割柑人
本欄逢周四刊登