Invader殺到入將軍澳堆填區嘅《蘋果》大樓嘞！噚日八方返工，見到大樓外牆竟然有個以Invader招牌「馬賽克」（mosaic）風格設計嘅蘋果同外星人圖案，幾經追查，Invader終於承認呢次「入侵」責任。點解Invader要搞《蘋果》？時機未到，八方都唔能夠透露，只知呢次入侵行動，冇造成任何傷亡報告，詳情聽日會喺「果籽」發佈。
之但係天機雖然不可洩露，但八方肯肯定，個圖案唔會被鏟囉，因為《蘋果》唔係特區政府吖嘛，點會一如Invader所講咁bad taste。
而Invader嘅兩件作品，曾經喺今年1月經蘇富比合共拍出超過250萬嘅高價，創佢個人作品拍價新紀錄，唔知《蘋果》大樓會唔會因此升值呢？