新地（016）前北角邨項目商場噚日命名「北角匯」（Harbour North），請股評人胡孟青及才子王貽興撐場，兩位北角街坊都好識做，話好期待新商場開幕，儀式仲由前主播嘉儀BB周嘉儀擔任司儀，可算星光熠熠。
「青姐」幾年前搬入北角，大嘆區內無大商場、無地標，好彩呢區特別在同聲同氣。呢頭講完，身邊「貽興王」爆句福建話，意指「識聽唔識講」，自認福建人。貽興王講到，如果唔係英皇中心地庫間森記圖書俾佢免費打書釘，「唔會成為作家」，希望北角匯可以有呢類租客招呼文藝青年。
新地代理租務部總經理鍾秀蓮表示，該場提供120至130個舖位，面積約150至1.4萬方呎，意向呎租由60元至300元，第1期最快2017年第二季落成。租戶方面，時裝店及食肆均佔約30%。