2013年上市的鳳凰醫療（1515），為本港少見的醫院股，上市以來頗受追捧，去年業績有不俗增長。不過，公司噚日出咗張通告，以有「潛在交易」傾緊為由，決定把3月宣派的末期股息大削70%，由原先每股派0.17元，改為派0.05元，簡直係從股東的口袋中挖番舊錢出來。
鳳凰醫療話，減派息可幫公司慳番1億元。公司係咪咁等錢使呢？根據其去年業績，鳳凰醫療截至去年底，連同存款證一共坐擁9.95億元（人仔．下同）現金，一年經營現金流2.7億元，去年資本開支僅1.1億元，零負債。區區慳番1億元股息，係咪真係對公司現時傾緊的交易，起如此關鍵作用？如果最後真的有下文，按道理用銀行貸款融資，都仲有好多空間走盞。
鳳凰醫療近期亦頻頻出現股權變動。其中一主要股東Senmart Investment，上星期才透過大摩做了一宗block trade，一口氣沽咗14.8%持股，套現近19億元，之後僅剩1.75%股權，隨時在街掟晒都得。另外控股股東3月時亦曾作出架構轉變，大股東徐捷把其33.27%股權，其中逾90%權益全部轉予父親持有，自己僅留5%。
鳳凰醫療雖定位自己做醫院股，但睇真其業績，當中超過一半盈利，其實是來自所謂的「供應鏈業務」，簡單來講，即係向醫院賣藥賺取差價。市場耳語謂，內地一採購公司紅惠醫藥，近日盛傳因要求藥企畀回佣而惹上麻煩。這紅惠醫藥，正是鳳凰醫療的主要供應商。
海迪