香港真係好多有錢人，話說前排永隆銀行人民幣定期存款息率好鬼高，有位大戶因為咁搬咗筆巨款過去，零售銀行部主管鍾少權（Derek）話有成10億元人仔，係由另一間中小型銀行轉過嚟，息率幾多做幾長等等就唔可以透露。
不過華華屈指一算，如果用10億人仔做一年定期存款，用返嗰時永隆最高4.55厘息計，一年賺4,550萬人仔，高過好多上市公司嘅每年盈利，真係名副其實嘅錢搵錢，一世唔使撈。
財源滾滾來，加埋股市大旺，永隆佣金收入大升，唔怪得Derek上個月可以放心去西藏旅行，不過喺高海拔地方，肺活量十足嘅人好易有高山反應，所以Derek話要放慢個人咁行。不過佢話走嗰時大意漏咗張回鄉證，搞到心情有少少緊張，急急腳返去拎，即刻有輕微高山反應，「要唔要索返兩啖氧氣呀？」佢話保持心境平靜就OK。