「每日一蘋果 冇人呃到我」，相信唔少人都記得《蘋果日報》20年前呢句經典創刊口號。20年後，《蘋果》仝人繼續緊守崗位，都要多謝各界嘅鼎力支持。
署名「一自閉孩子家庭」嘅讀者非常有心，噚日送咗200個蘋果到將軍澳《蘋果》大樓，而且仲附上一張心意卡，送畀社長葉一堅，卡上寫住：「感謝您們為公義發聲，200個心意蘋果，祝二十週年，生日快樂」。嘩，呢200個充滿愛嘅蘋果，令八方同一眾同事都好感動，堅哥望住呢份讀者送上嘅「生日賀禮」，笑住回應：「今日收到張卡同咁多個蘋果，就發覺同事辛苦咁多年，都係值得嘅。」
雖然《蘋果》企硬力抗各方嘅打壓同殲滅，之但係送到《蘋果》大樓嘅蘋果呢……就逐一被各部組同事「消滅」咯。