自由黨青年黨噚晚搞Social Wednesday，就請來股評人「陸叔」陳永陸摸住酒杯底講股，佢話年頭所有估評人都估唔到個市會升得咁快，皆因當時觀望資金幾時到，加上對經濟增長睇淡，不過「估你唔到先有驚喜」。
陸叔又大談翻睇《大時代》心得，話92年睇唔多明箇中真諦，𠵱家再睇「特別和味」，佢話股票市場冇叻仔，以佢自己為例，87年股災輸咗一半身家，搞到要避走新加坡，到92年先再開始買股票，佢嘅心得好簡單：股票其實唔係用嚟短炒，係投資，佢有啲股票揸咗24年㖭。至於大家最想知牛市仲有幾耐，佢就繼續唱好喇，但唔鼓勵大家齋睇住個市唔專心工作，所以都係嗰句，買股票要睇長線喎。