第二場由前夜總會教父羅焯愛駒「名馬」掄元，第三場四班一哩，則輪到另一名人馬主、本地廚神兼飲食業老闆黃永幟捧盃攞威。
人稱幟哥嘅黃永幟，今場以名下首駒「為食仔」同團體馬「搖錢樹」雙龍出海，結果「為食仔」上仗由柏兆雷於田草跑完第二後，這晚渡江一換雷神即贏，並以3.6倍次熱身份開齋，兼捧走國際商事仲裁委員會盃。
「搖錢樹」夥拍薛寶力19倍跑第二，幟哥首次捧盃外，還首次包Q，Q派389元好和味，幟哥賽後更表示自己沒有投注其他馬，正正只買了「為食仔」、「搖錢樹」單Ｑ，今晚名利雙收畀佢玩晒。
呢場落飛馬表現麻麻哋，雙龍「神奇飛龍」同「喜寶天龍」都冇影，大熱門「駕善」則虎頭蛇尾跑梗頸四，第三名由車前倒後之「騏名燈」後上攞到，四重彩派七千七百幾。跑完頭三場，雷神憑一對1號馬「豁達瀟灑」同「為食仔」自製一口熱門孖寶，個人今季累積贏到113場頭馬，只要贏多兩場就可以打破由韋達保持之一季114W歷史紀錄。