由一班建築師同建築設計師組成、反對就假普選袋住先嘅「思政築覺」，早喺今年3月已經聯署，要求立法會建築、測量及都市規劃界議員謝偉銓做業界民調，了解業界意見後先好就政改投票。事件拖逾一個多月後，花生友噚日向謝偉銓查詢，知悉謝會將民調喺本月18至19號交予業內四大學會，主要問業內合資格選民係咪接受政府提交嘅政改方案，答案可以選擇「接受」、「不接受」或「無意見」，最遲6月3日交番畀佢。
閃縮辦論壇
至於係咪會按民調結果投票呢？謝偉銓就話，要視乎回應率喎，話最重要係鼓勵業內選民表態，「我唔可以根據只有2、3個百分點回應率嘅結果就作決定，因為我哋業內選民有時對呢啲問題唔太熱衷」，似乎仲有好多變數咁。
思政築覺成功爭取業界進行民調後，近日又發現謝偉銓本月26日會搞業內政改論壇，但就奇怪相識嘅建築師之中，冇人聽過有關論壇嘅消息，成員最終要靠政府部門內工作嘅朋友轉告先知有呢個活動，唔明點解謝偉銓搞個論壇都咁閃縮？
謝偉銓話雖然佢身為議員，但並冇全部業界人士聯絡方法，所以只能透過相熟人士向業界人士發出邀請，指每次都有要求四大學會轉發消息畀會員，歡迎唔同政見業界人士出席表態喎。
花生友