繼Uber上月啱啱派完錢搶客，「快的」又用銀彈應戰！佢今次同新鴻基（016）旗下4個商場合作，首次登記快的App嘅客戶，搭的士到wtc more世貿中心、將軍澳東港城、上水廣場同新蒲崗Mikiki商場，出示快的戶口登記，就可以換領50蚊商場現金券。呢4個商場都唔係傳統蒲點，同快的合作，谷吓人流，算係互惠互利。
相比舊年同「滴滴打車」嘅大戰，4個月內燒30億人仔，對𠵱家已經與滴滴化敵為友嘅快的嚟講，派50蚊現金券濕濕碎啦。
有錢就是任性，快的一向都好豪爽咁發展香港市場，下載App即時派手機充電器、每程的士回贈10蚊等等。不過，快的喺香港業務仲燒緊錢，銀彈政策究竟可以維持幾耐呢？大家拭目以待啦。