今季日劇收視全線仆直，就算出動大牌如木村拓哉同堺雅人收視都唔理想，富士台「月九」劇集《歡迎來到我們家》，由嵐成員相葉雅紀配是非女星澤尻英龍華，再加個當時得令嘅有村架純，但係上周收視都跌到得10%，於是前晚一集就出動澤尻同有村各自「上床」演出成功刺激收視上升至11.9%收視。
劇集故事講相葉因一家人無故經常受騷擾，所以同澤尻聯手追查真相。而前晚一集講扮演相葉妹妹嘅有村架純，因為手機被盜，俾人用機入面佢同前男友藤井流星嘅床照威脅而要偷阿媽錢。而澤尻就喺相葉家中研究案件嘅時候瞌着咗，相葉搬佢上床，仲被阿媽撞入房，以為相葉想搞澤尻㖭。
撰文：多雪花