繼多蒙特翼鋒馬高列奧斯用Emoji嘅馬騮仔表情符號嚟慶祝入波後，一班世界級女子網球手都玩埋一份。WTA官網喺周一展開嘅羅馬公開賽賽前搞咗個Emoji扮嘢挑戰賽，搵嚟寶查、禾絲妮雅琪、舒拉寶娃同埋盛傳已經同效力拜仁慕尼黑嘅德國國家隊隊長「小豬」舒韋恩史迪加秘婚嘅伊娃諾域等九位球手，睇吓邊個扮得最神似；禾琪仲將自己12個Emoji表情上載至instagram，唔知第日會唔會俾人用嚟做短訊嘅表情符號呢？
另外，賽會又搵咗托迪、艾殊利高爾同費奧倫斯等羅馬球星，拍住迪祖高域同禾絲妮雅琪等球手一齊打慈善賽。至於喺周一展開嘅首圈賽事，戰果相當正路，男單狄美托夫同女單嘅威廉絲等，都順利晉級。