本周三(13日)谷戰焦點，首推48歲老將巫斯義刑滿復出，他早前因未盡力策「精彩鬥士」被判處停賽15個賽日，查近十年內先後有多位外籍騎師，因未盡力策騎，被罰停賽六個賽日或以上，結果他們在同一季內復出，均能立即取得頭馬，以彌補損失，反映追數乃人之常情。
不少人覺得「精彩鬥士」一案咁大鑊，阿巫下季唔易攞牌照，亦可能因此淡出，不可近年較少申請全季牌照的阿巫，竟然雄心壯志，據知他已入紙申請下季全季牌照，難怪佢停賽期間常操馬，博取馬會好感。今期重返戰陣亦呈現強勢，騎足八駒，無非希望爭取好成績，力求獲發牌。
頭場「吉利高」曾兩次配巫斯義上陣未失前四名，人馬合拍毫無疑問，今季屢拼不逞，投文廐後足足兩季才首度安排轉跑谷草，換人變招有力取得突破。
第三場「智高星」肯定已減夠分，最近一次贏馬正是前季五月，上季在五月三戰亦未失獎金，提防今仗於五月上陣又到位。第七場「愛寶」上周三入位後急急再跑，觀乎徐廐近五匹匆出馬四駒入位，睇部署決心乘勇再拼，追得過。