每年五月中開始，就係美國大學之畢業季節，公子L在中午飯局預告，下兩個星期會缺席，因為佢要飛去紐約參加細仔大學畢業禮，當然亦會順路在新英倫行一個圈，佢自己就係波士頓大學畢業嘅嘛。佢位公子在哥倫比亞大學讀書，與鐘錶L之兒子相同，同校不同系，一齊畢業後，同樣加入金融界，在紐約返工，暫時唔返香港咯。公子L講過，在哥倫比亞大學無論讀邊科，畢業生都係加入金融界為主，條條大路通華爾街，畢竟紐約係世界第一金融中心，有不少令大學畢業生難以抗拒嘅工作機會。
參加兒子畢業禮自然高興，想起屈在飛機上十五小時，公子L就皺晒眉頭，年紀大咗，就會好怕坐長程機，如果時間許可，佢其實想先飛去三藩市，遊覽一兩日習慣咗時間差之後，先再飛去紐約。講起三藩市，久居該地嘅老友記顧問K來電郵，問左丁山識唔識一位香港設計大師Henry Steiner，話三藩市藝術學院大學（Academy of Art University）會頒授一個榮譽博士學位俾呢位香港名師兼邀請佢為MFA（藝術碩士）畢業禮嘅演講嘉賓喎，畢業禮會在五月二十一日舉行。
考左丁山咩，Henry Steiner在香港及亞洲大名鼎鼎，享譽設計界五十年，HSBC嘅標誌logo就係佢設計嘅，今年已經81歲，自巴黎索邦及耶魯大學畢業後，1960年代初就嚟咗香港居住，展開設計事業，壹週刊之經典特刊「香江百人誌」就有佢嘅小傳，依家三藩市藝術學院大學（創辦於1929年，係私立藝術及設計大學）頒個榮譽博士學位俾佢，佢當然受之無愧。
Steiner生於維也納，係長居香港之外來藝術設計優才，已經算係香港人。本地藝術家雖然普遍少受重視，但絕對不乏有心人提倡發展藝術，據左丁山所知，一羣本地藝術界人士有一個組織，叫做「繪畫大道中」，會由5月15至5月17日在沙田火炭黃竹洋街15-21號華聯工業中心A座13樓1室舉辦藝術講座及作品展覽，部份展品可供出售，得款用於資助「繪畫大道中」之未來藝術推廣活動。講座題目廣泛，講者有陳偉邦，梁寶山，林東鵬，蟻穎琳，潘蔚然，周俊輝等等。最有趣一個題目係：「呢度講呢度散──記者眼中的藝術家」，由鄭天儀、黃子翔主講。欲知詳情，可上網： https://www.facebook.com/PaintingOnAndOn。