下季加盟曼聯嘅荷蘭翼鋒迪比除咗鍾意踢波，原來仲係個拳迷！我求大俠覺得朗尼就最開心嘞，嚟緊手痕想打拳嗰陣，可以搵新仔迪比切磋吓，但希望佢兩個玩吓好嘞，相信曼聯領隊雲高爾唔想見到迪比同朗尼鬥拳而受傷，搞到冇前鋒用。
荷蘭大宅有標準擂台
當兩間球會宣佈咗迪比嘅轉會後，呢位21歲荷蘭翼鋒就即刻想賣荷蘭間屋，個價大概係120萬鎊。有記者入咗去間屋度睇，發現迪比原來係拳迷，入面竟然有個標準擂台喺度，旁邊仲有啲沙包，方便佢得閒練拳。走入浴室，真係嚇一嚇，成大個拳王阿里印咗喺牆度，可能迪比鍾意一邊沖涼，一邊望住阿里啦。迪比都話，佢好期待同朗尼傾吓打拳嘅心得，「曼聯有好多球星，我想同佢哋每一個一齊踢波，特別係朗尼。朗尼係個偉大嘅球員，我唔單止想同佢做隊友，仲急不及待同佢傾吓拳擊，相信我哋會傾得好開心。」
朗尼前排喺屋企廚房打拳，俾前隊友、𠵱家踢緊史篤城嘅巴士利一拳打到瞓低，成為一時佳話，之後朗尼對熱剌場比賽入波，都用打拳動作嚟慶祝。下季迪比嚟到曼聯，朗尼就唔使叫舊隊友，近近哋可以搵迪比喺廚房切磋。當然，話唔定迪比會喺曼市間新屋度起番個擂台，邀請隊長嚟過番兩招。不過，我求大俠就戥雲高爾擔心，萬一迪比同朗尼打到變豬頭，咁點踢比賽？如果我係雲帥，索性撈埋拳證，睇實佢兩個。講起雲高爾，英國《太陽報》就傳曼聯想要埋另一位雲高爾喺荷蘭國家隊嘅愛徒、燕豪芬中場韋拿杜姆。
曼聯鬥巴塞票價過萬
其實，想睇迪比代表曼聯踢波，唔使等到八月，紅魔七月就會去美國踢國冠盃，如無意外，迪比會喺美國處子登場。對CF阿美利加、巴塞隆拿同埋巴黎聖日耳門（PSG）呢三場波已經賣緊飛，睇番ticketmaster.com，以巴塞嗰場啲門票最貴，呢場波最貴門票1,490美元，計番港紙都超過萬一蚊（見附表）！最平嘅飛就要90美元，都成700蚊港紙㗎。對阿美利加同PSG啲門票就平啲，最平飛40美元，300幾蚊港紙就有交易。
識睇，一定係睇足英台【英波Live】：
http://soccer.appledaily.com
http://bit.ly/engballlive