2017，一定唔得。跟雞鴨鵝唱反調，三人組遊車河，高鐵卻開倒車，工程一再延誤，五部曲半天吊。
高鐵唔通，夾硬要過，只會搞出人命，所以唔準備谷票，街站再多，官報再插，大媽再鬧，改變不到唔得的事實。2017冇高鐵，維港不會塌，太陽照常升起。西環一錘定音，唔使問天文台。
831落閘方案，被谷行，一定要得。唔得，太陽會變黑嗎？五部曲縮水降呢走埋音，會死人嗎？梁振英是千二人篤票篤出來的，夠差勁吧，但香港人還是活過來，並未廢武功。再來一次相同的千二人，再揀梁振英一次，只不過是國際笑話再多鬧一次而已。記得菲律賓三世總統的笑臉嗎？那是一臉不屑的冷笑。到時，再見梁特首，三世總統還是會，忍唔住笑。港豬別見笑。
2017，預先入袋的三個特首候選人，順序是廢偽、廢戥、廢柴。你肯袋住，阿媽就會落手幫你娶老婆，勸你：今日唔娶唔知幾時封艇，娶住佢個肺先，將來優化，再娶全身！嘿，你跟對方個肺洞房，無得頂！一定得！