日前網上流傳一段短片，片中多名中學生有人着住校服，有人攞住疑似「貓紙」發表撐政改言論，但原來短片中嘅學生係被廣西社團總會擺上枱，用面試片段造假。少女Amber為此喺YouTube上載名為「少女逐點駁斥為政改護航中學生」，片長8分鐘，逐點反駁政改袋住先，獲網民爆like激讚。
「肚餓就要揀屎？」
例如有人話政府已多次諮詢，相當關注民意，Amber就質疑高官落區只係做政治show，唔係真正聽意見。至於特首梁振英同建制派成日恐嚇港人如果唔袋住先，唔知幾時重啟政改？Amber就反問：「我好肚餓，面前得一嚿屎同一碗白飯，咁我係咪就要去揀嚿屎？而唔等白米煮成白飯？」
有人話民主不可一步到位，Amber重申香港民主進程已經有近30年嘞，反問「我哋係咪仲要慢慢等呢？等邊個畀民主你呢？」網民Jimmie Yip讚Amber「明辨是非，前途不可限量」、CK lee就話佢「有理有據，打倒歪理」。