花生友呢排見親政界中人，都會多口問一句：究竟呢次政改，會過抑或唔過㗎？點解要咁問？無非因為有部份人話泛民一定唔會轉軚之餘，卻有部份人話對政改過關好有信心，到底邊一邊先至有水晶球？花生友都唔敢肯定。
反而有一個關於政改口號嘅意見，可以同大家分享，等大家一齊畀吓意見。雖然呢次政改宣傳以「2017，一定要得」為口號，似乎都深入民心，至少惹嚟網民熱烈地惡搞，「一定瓜得」、「一路向北」以致「一早死得」都令唔少人發出會心微笑。
但其實有啲政界中人，卻覺得呢個口號唔多合適喎。點解？有人同花生友講，政改係全香港人嘅事，首輪諮詢用「機不可失」，確實好有感染力，因為至少冇咗手上一票，係全香港人都受影響，「所以口號所講嘅『機』，即係機會，係全港人福祉，咁講比較大體」。
為政府要功績而設
相反今次嘅口號「一定要得」，聽起嚟卻好似係純粹為政府要有功績而設，所以表明一定要得，有政界中人就話嘞，「我聽起上嚟都覺得，啲官員叫呢句口號，好似係為自己要過關咁款，凸顯唔到市民有乜損失，呢一點其實係敗筆」。
花生友聽落，都覺得呢位高人講得好有道理，分析都幾合理。之不過咁，當市民就政改方案嘅愛恨咁極端，查實個宣傳口號有冇感染力，相信對呢場政改大戰，都唔會有乜顯著性影響咯。
花生友