正義聯盟召集人李偲嫣5月2日喺中環遮打花園以「廢青學生妹」造型跳飛機,令唔少市民一見難忘,之但係偲嫣bb咁用心良苦嘅演出,原來冇攞正牌獲批准。有人報料話,正義聯盟呢次活動冇向康文署申請場地使用許可,康文署回覆八方時證實此說。
康文署發言人話,任何團體如果要喺該署轄下場地舉辦活動,要事先向署方提出申請,而「本署並沒有收到任何團體申請於5月2日使用遮打花園舉辦活動」,又指該署職員當日巡視期間,發現有團體未經批准下使用場地搞活動,已即時向有關團體代表作口頭勸喻同警告。發言人稱事件會記錄在案,作為審核有關團體日後申請該署場地舉辦活動參考之用。根據紀錄,該署未曾發現正義聯盟喺冇申請情況下使用該署場地記錄,換言之偲嫣BB呢次都係初犯。