𠵱家上市公司嘅獨董好似可以世襲咁樣！國泰航空（293）噚日宣佈，做咗超過12年獨董嘅董建成唔再尋求連任，國泰隨即委任董建成姪仔、即係前特首董建華大仔董立均（Andy）做獨董。
50歲嘅Andy跟國泰其實都有些少關係，佢𠵱家喺家族公司東方海外（316）做執董，佢返去東方海外之前，喺港龍航空做過4年半營運總裁，跟過當時行政總裁許漢忠，國泰2006年併購港龍，佢喺嗰年年初就走人。事隔9年，佢轉個大圈又成為國泰獨董，感覺應該幾特別。
Andy雖然低調，即使係東方海外嘅業績會都冇乜機會見到佢，但佢其實相當平易近人，絕冇太子爺嘅架子，佢喺普林斯頓大學讀機械及航空工程，做完港龍返去東方海外經營家族生意十分合理。此外，下月去做機管局主席嘅蘇澤光亦辭任國泰獨董一職了。