亞洲首富王健林又億億聲買畫！蘇富比本月5日喺美國紐約拍賣會上以1.59億元賣出一幅莫內嘅《睡蓮池與玫瑰》，原來買家係王健林旗下大連萬達。大連萬達喺2013年底亦曾經喺拍賣場上，以2.18億元投得畢加索名畫《兩個小孩》，相對而言，王健林可能覺得花喺呢幅莫內嘅錢只係濕濕碎。
王健林投得呢幅《睡蓮池與玫瑰》係莫內1913年嘅作品，莫內從同一個視察角度畫咗3幅油畫，其中一幅正藏於阿利桑那州鳳凰城美術館，另一幅由一名私人收藏家收藏；王健林就買入第3幅。
萬達集團藝術品收藏負責人郭慶祥講明，佢哋將會繼續搜集喺世界美術史上佔據重要地位嘅畫家作品，豐富佢哋嘅收藏體系。即係王健林仲會繼續落本買藝術品喇。