既然嘜唔到美斯(圖)，出局幾成定局，退而求其次，入到波甚至主場贏番場，以拜仁慕尼黑首回合嘅表現，加點決心，應該唔難。繼續兩瓣出擊，入球「大」加主W。
隨住車仔一早封王，坊間所聽到嘅英超話題接近零；不過曼城啱啱狂請今季冇段好睇嘅昆士柏食六蛋，進攻如行雲流水，戰意同踢法都值得一讚，可惜衞冕失敗，第二或第三名過終點已無意義，就算唔係哥迪奧拿接掌兵符，比歷連尼也難保飯碗。曼城來季肯定大清洗，令人期待。
老兵有得落場，鬥志多數昂揚，謝拉特離別紅軍在即，卻連續兩場聯賽士哥，係佢今季首次，只見大隊長喺史丹福橋入波後，默默低着頭跑回自己後半場；佢嗰種無奈嘅神情，令人印象難忘。下戰周六深夜，會係利記今季最後一次主場鬥水晶宮，若然謝四「中三元」會走得更完美。紅軍呢支老牌球會，到時點樣送別呢位自1998年出道起，已效力紅軍嘅老臣，值得捱夜睇呢場「無關痛癢」嘅英超。
近期茶餐廳足球熱話，當然係停不了嘅美斯，點樣連同包括佢嘅MSN組合，用咗末段15分鐘摧毀拜仁。不過深層啲反思，長途賽，步速先係球會嘅命脈。拜仁過去三季未嘗連敗，但今季段力用早咗，德國盃出局後，近戰再逢三連敗兼零入球。一支歐洲頂級班霸，賴冇咗入傷兵營嘅年逾30老兵洛賓同列貝利致陷低谷，不合埋，拜仁大變在即了。來自西班牙嘅哥帥上仗賽前早講嘜舊部美斯冇可能，先滅自己威風，呢樣德國人唔會講出口，如今球會喺大部份時間不落下風下，先落後0:3，今晚次回合贏番場嘅戰意會比巴塞強。
巴塞近績如風捲殘雲，季尾時間恰好，近七戰入咗25球失0球，無論下周聯賽是否如期舉行，重奪錦標大定，備戰心情將更放鬆。拜仁今晚單W較熱，寄望上仗五次撲救嘅紐亞續演鋼門本色、球隊加辣中場搶截，未必先要同巴塞一樣踢三前鋒；上回合傷癒後表現一般嘅舒韋恩史迪加、拿姆同「面罩人」羅拔利雲度夫斯基會有進步表現，今場唔只係拜仁嘅面子戰，哥帥能否如熾熱傳聞所言，季後轉飯鑊教曼城，今場「攞彩波」嘅戰果亦甚為關鍵。
信拜仁破近期入球荒，今場同上回合策略一樣，入球「大」賠率冇上次咁好分，可以加至兩注「大」加一注主W嘅策略，欣賞呢場可能係今季歐洲球壇最後最精采一戰。
波神
電郵：mailto:[email protected]