前傳媒人張寶華噚日喺《信報》專欄表態支持袋住先，估唔到言論被人瘋傳，有讚亦有彈，有人仲話好在冇應承幫佢做節目。到底Sharon講咗乜？佢以高官落區表現惡劣、唔受市民歡迎為由，話長此落去唔會有好結果，強調唔同意袋住先後選出嚟嘅特首會同𠵱家一樣，因為幾百萬人投票，要操控都操控唔嚟。
其實呢種想法同自由黨等開明建制派雷同，由Sharon講出嚟卻似乎更惹人注目。Sharon向八方講，佢唔係第一次話要袋住先，唔知點解被炒熱，以羅文《家變》歌詞「變幻才是永恆」解釋，「我覺得變係真係好過唔變」。
而同黨友喺政改問題上有相反意見嘅民主黨狄志遠，近日就用「政改民意關注組成員」身份為梁粉陣地《港人講地》拍攝短片，呼籲泛民議員妥協袋住先。