小米雷軍向蘋果教主喬布斯偷師之後，就向阿里巴巴創辦人馬雲學嘢。講緊係，小米終於踩入互聯網金融市場，旗下小米金融新近推出「小米活期寶」，性質同阿里關聯公司螞蟻金服嘅「餘額寶」差唔多，都係為用戶提供一站式金融理財服務，等佢哋滙啲閒錢入去收息。
除咗活期寶，小米金融又預告，未來幾個月會陸續推出活期理財、定期理財、貸款等一系列服務，擺明同阿里、騰訊（700）、京東等搶客。
小米勝在手機用戶多，佢嘅MIUI系統本身擁有1億個用戶，加上早前推出小米錢包，相信可以產生唔少有用嘅大數據，而佢又開始涉足智能家居、穿載式智能裝置，接觸到嘅用戶群較阿里、騰訊更加貼近用家生活，後來者居上都唔係冇可能。