今年首季iPhone喺中國銷量超越美國，成為蘋果最大市場，難怪蘋果行政總裁（CEO）庫克（Tim Cook）近年咁重視中國市場，噚日佢仲特登喺新浪微博開咗個賬戶，直接跟中國「果粉」交流，5粒鐘就吸引超過28萬名粉絲關注。
庫克暫時只係得一句留言：「你好，中國！很高興再次來到北京，並宣佈創新的環境新項目」，佢仲寫齊中英文，非常識做，隨即吸引超過3.5萬人回應評論，2.8萬人轉發。
庫克上任後，一直對中國市場示好，唔單止將新產品首發地區添加中國市場，仲推動同中移動（941）合作，推動到蘋果業績越來越靚仔。
而佢講緊嘅環境新項目，就係大力推廣可再生能源，跟世界自然基金會（WWF）合作，提升兼保護近百萬英畝中國境內嘅「負責管理森林資源」，希望森林成為另一種可再生資源。