如果係Hello Kitty粉絲，一定知道全球首間Hello Kitty中菜軒，上個月已經喺尖沙嘴廣東道試業，餐廳內嘅裝潢同食物，都係參照中國傳統再結合Hello Kitty嘅造型而設計，估唔到引起外媒關注喎，就連《時代》雜誌都刊出專題文章介紹呢間餐廳，相信下月一日正式開業，一定引起貓迷朝聖。
全店一副「貓樣」
Hello Kitty中菜軒店主以筆名萬光接受《時代》訪問時話自己係一本健康雜誌嘅創辦人，希望堅持全天然食材。佢透露首次經營酒樓，2013年底開始接洽擁有Hello Kitty版權嘅日本公司Sanrio，去年4月終獲授權。
中菜軒會提供37款點心，全部都同Kitty造型有關，例如蝦餃表面有Kitty蝴蝶結，流沙包、馬拉糕就直情用Kitty貓頭樣呈現喺食客眼前。而店內嘅裝潢，無論枱凳、屏風、茶壺、茶杯、筷子及湯匙等，據知都係一副「貓樣」，牆上掛住嘅中國四大美人國畫換Kitty樣後，係咪眼前一亮？