人人都想喺港股大時代搵食，新世界發展（017）主席鄭家純（純官）都唔例外，大市成交增，潛力股除咗係港交所（388），仲有券商股。唔怪得上月底銀河證券（6881）配股集資接近240億元，純官旗下家族企業周大福都斥資23.7億元認購。
銀河證券上月底以每股11.99元配股，噚日聯交所資料披露，周大福喺場外以相同價格買入1.98億股，持股量5.36%，過咗5%披露水平而曝光，應該就係接咗少少銀河配股嘅貨。銀河證券噚日收報12.74元，周大福賬面約有6%利潤。
有趣嘅係，新世界同系新創建（659）2009年將海通（前稱大福證券，665）賣走，周大福舊年初就入股耀才證券（1428）9%，𠵱家又投資銀河證券，純官係咪咁唔捨得證券行生意呢？