社民連秘書長陳德章前年喺施政報告及財政報告諮詢會上，用雞蛋掟中財政司司長曾俊華嘅右額，早前普通襲擊罪成判囚3周。
稱長者貧窮問題嚴重
社民連fb噚日發表陳德章喺獄中向鬍鬚曾寫嘅公開信，佢透露喺獄中見到唔少長者因為窮而犯盜竊或走水貨等罪行，強調長者貧窮問題好嚴重。
陳德章對於鬍鬚曾以「醫生叫我唔好食咁多蛋」回應中蛋唔多like：「閣下可能覺得自己很富幽默感，但我感到閣下並沒有認真聆聽我們的訴求和看看社會的現況」，強調自己不惜付上個人自由，無非係想爭取公義，「長者生活要有尊嚴，你（曾俊華）能聽到嗎？」表明對被判入獄無悔無恨，出獄後一定續爭全民退保同普選制度。
原來陳媽媽喺母親節探過佢，引述媽媽打氣：「媽媽很心痛！但我無怪你，因為我知你不是一時衝動，而是為社會做事。既然你選擇這條路，就一定一定要堅持走到底！」