噚日農曆三月廿三日係天后誕正日，雖然香港地好多漁民都已經上晒岸，轉行唔再打魚，但天后誕已成香港重要傳統節慶。大時大節梗係要祈求天后娘娘繼續保佑平安，慶祝活動當然唔少得。噚日全港各區天后廟都大搞天后誕活動，但八方最想睇最傳統嘅「搶花炮」環節，就唔係區區都有，被形容做「香港南極」嘅蒲台島就保留到呢個傳統，幾百名漁民後人噚日齊集蒲台島，就係為咗將花炮成功搶返屋企，希望帶嚟好運。
元朗十八鄉村民都有個天后寶誕會景巡遊，話說個巡遊已經有52年歷史，33隊巡遊隊伍喺元朗街頭又舞龍又舞獅，淨係睇個巡遊都已經要3粒鐘。巡遊隊伍最後返去大樹下天后廟酬神，至於巡遊嘅主角「花炮」會點分？元朗人一早轉用抽籤方式解決。