鄉議局27個鄉事委員會早前改選後，6月1日輪到鄉議局領導層改選。新界人嘅嘢，一向都係和氣生財，所謂選舉，好多時都係私下協調溝通，大家各取所需就完事，而鄉議局一直要求以和為貴，只要現屆主席劉皇發、副主席張學明同林偉強都有意再選嘅話，6.1冧莊，真係話咁易。
之但係花生友卻聽聞，當大家以為佢哋3位巨頭如無意外會自動當選之際，江湖卻有傳聞，話有後起之秀都想喺呢次改選試腳。邊個「有心人」咁藝高人膽大呢？據聞係李耀斌，西貢北約鄉委會主席，之前都搞過反對大浪西灣納入郊野公園範圍嘅抗爭。
由於鄉議局嘅3領導職位改選，向來由3個區，即係元朗區、大埔區同南約各佔一席位；而西貢北約鄉委會屬大埔區，而張學明係大埔鄉委會主席，換言之李耀斌若然要出戰，就同張學明兩個只能活一個。
捧「發仔」上位
有鄉事花生友話呀，發叔拍住張學明同林偉強作為領導班子，任何人想挑戰其中一人，驚唔驚令人以為唔畀面發叔呢？花生友問過李耀斌，佢話聽過佢會出戰嘅消息，「暫時都係傳言」，但不忘補充喎：「（距離選舉）仲有好長時間，好多嘢都有變化。」
鄉議局改選後，局方會全力搞明年立法會選舉，屆時極有可能由發叔囝囝劉業強接棒喺鄉議局功能組別出征，上周鄉議局搞嘅《基本法》論壇，特別安排「發仔」作總結發言，明顯一班鄉紳，有心畀世姪登吓大場面。
花生友