麥當勞新任行政總裁Steve Easterbrook上星期公佈改革方案時話，「沒有一盤生意或品牌永遠都成功，現實係最近業績表現都好差，數字不騙人。」
食客口味變，餐廳要諗計提升食物質素同經營策略。香港零售同旅遊業客流減少，旅客同食客一樣，口味話變就變，特別係中國旅客。英國《金融時報》研究機構中國投資參考，上月底發表中國旅客外遊報告，2014及2015年內地客最常去外遊地方係香港。未來12個月計劃去嘅地方，香港排第四，首三位係法國、南韓同日本。報告又發現，內地客嘅夢想旅遊目的地，香港冇份，歐美國家包辦前十位，唯一上榜嘅亞洲國家係日本。
報告結果反映內地客視香港為短途旅遊目的地，就好似港人長周末會飛去台灣或過澳門。其實內地客比以前更識得玩，佢哋去旅行模式跟港人越來越似，開始唔跟團，轉玩自由行或者自駕遊，交通住宿自己揀。旅客自主行程，連帶影響消費模式。家庭收入過35萬元人仔嘅內地客，對上一次外遊購物平均用1.6萬元人仔，比上年縮減三成幾。但係娛樂同租車或參加當地觀光遊開支，分別增加31%同78%。而家內地客去旅行想要taste，即係講求體驗，單單購物未必滿足得到。承上所講「冇一盤生意或品牌永遠成功」，本港零售旅遊想捉住大財主，洞識佢哋嘅需求轉變，總好過倉倉促促搞一輪開心着數大行動。
C+B
本欄逢周一刊出