中國總理李克強上周四到訪有「中國矽谷」的中關村，話要鼓勵創新投資。總理一開口，創業板指數在上周五即刻爆升近6%，再創歷史新高。其實成個創業板爆成咁，同李克強今年一路力撐科網企業好有關係，又話要「互聯網+」，又要發展電商。
現時創業板股份平均市盈率已經超過100倍，估值已經高過當年美國納斯達克爆煲之前，但總理力撐，冇人夠膽話會有好大問題，唯有一路炒上去。
上禮拜五，創業板股安碩信息成為新股王，收報400.6元人民幣，亦係A股史上首隻股價上400元的股票。情況更誇張係已被稱為「妖股之王」的暴風科技，3月24日上市至今，已經32個次升停板，期間公佈首季業績轉盈為虧，又有三位董事跳船，但股價照升22倍！
黃尹華