青島港（6198）早前獲金手指Value Partners落場大加碼無幾耐，而集團港口呢瓣，又係一帶一路所屬重要區域，但預測PE就平過行家近半，追最近磅嘅，都講緊要升近70%！
青島港基地青島，係海上絲路，同新歐亞大陸橋經濟走廊重點城市。而一帶一路係重中之重國策，阿爺規劃海陸五條路線當中，有四條就可以由青島港始發，青島港喺一帶一路，係巴巴閉！
食住一帶一路國策
去年，青島港貨物吞吐量增幅達到8%，超過沿海港口5.6%平均增幅。睇到亦諗到，去年一帶一路都仲未開波，但青島港憑住呢個絕對地利，已經好掂檔。而隨住青島港強化海鐵聯運，升呢綜合物流模式，兼加快佈局，同海上絲路重要港口巴基斯坦瓜達爾港、柬埔寨第一大港西哈努克港，簽訂友好港口協議。食住一帶一路國策走，青島港中線張成績單，肯定仲靚仔。
咪扯咁遠，場內專業評估，青島港明年預測PE，得10倍。場內行家，經呢轉炒一帶一路，大連港（2880）明年預測16.8倍PE、廈門港（3378）17.8倍、天津港（3382）17倍。又祖國唐山港（滬601000）明年21倍PE，寧波港（滬601018）更高達29倍，青島港平行家起碼平咗40%。
又Value Partners所佔青島港6,353萬股H股，或7.3%權益，喺上個月27日曝光。
隨後一日，Value Partners更大幅加碼增持青島港，權益提升到9,713萬股或11.3%，入市成本價介乎4.66至4.8元。青島港現價（5.01元）同Value Partners增持價，係差無幾。同大孖沙齊齊買青島港，當追最近磅大連港16.8倍PE，講緊都要升68%，到8.4元。
錢雋
細價股專家
本欄逢周一、三、五刊出