九龍倉（004）呢個星期五召開股東會，主席吳光正喺會後就會正式卸任主席與董事職位，為留紀念，佢除咗印製咗一份九倉「年報特別版（Special Edition）」講感受之外，近日仲接受上流社交圈雜誌《Hong Kong Tatler》專訪，講生活逸事，認真少有。
成篇訪問橫跨8大頁，仲加插咗唔少吳光正嘅型仔pose相，一睇就知落足心機。
聞說，整個採訪過程用咗9粒鐘，雜誌社派出多位記者、攝影師、形象設計師跟實吳光正，捕捉佢喺工作同埋運動時嘅神髓。
68歲嘅吳光正出名keep得好，佢喺訪問入面透露，自己非常熱愛運動，唔單止一星期會打四次網球，仲係喺65歲先至開始滑雪，而佢舊年仲考到深海潛水牌㖭。阿爸都咁熱愛運動，難怪佢阿仔吳宗權成個運動健將咁喇。