【專題籽：胚芽故事】
網絡世界，不抽水，不出頭。最近的成功例子，是政府惜食吉祥物「大嘥鬼」對TVB掟蛋糕宣傳新節目的怪哉意念，借圖打圖，你掟我吃。我表示「相對濕度為負水平」。一句「蛋糕係用來食，唔係用來嘥」，博得大眾直豎虛擬拇指，面書粉絲量升得快過恒指。一向慢九萬拍的政府，今勻反應超音速，原來背後發功的是廣告公司。用卡通人物宣傳，還受落嗎？廣告人有話說。
我認，我麻甩。越美麗的東西我越不可碰。大嘥鬼，兩個字，好鬼醜，但在我眼中，三個字，好鬼可愛。眼闊肚窄的衰樣直衝眼球、洗腦rap歌對準幼兒市場、3D立體真身出巡學校俘虜小學雞，令這官方吉祥物有另類market。直至蛋糕圖於面書一出，先引來報章報道，然後原本只有五千多粉絲的專頁，一晚間暴升一倍（截稿前已逾一萬二千）。
幕後創作團隊來自廣告公司adbrownies，兩位年輕腦人Nick及Rebecca，專責為大嘥鬼管理面書。蛋糕圖抽水抽到太平洋都乾，係威喎！Nick說：「抽水？冇呀，咁蛋糕真係用來食嘛，大嘥鬼咁諗，我哋就咁講……」得得得，放過你。Rebecca說：「那一晚，每次更新都多了一堆粉絲，係咁升，好開心。」大嘥鬼會回覆各式提問，見招拆招，識睇一定睇留言。「黃錦星」與「樣衰」這些字眼老是常出現，但他每次都能幽默回應而不失霸氣。例如有人留言：「PR可以將隻咁核突嘅公仔賦予性格，搞到咁可愛，都幾叻喎！」他回覆：「我心情好複雜，你好似話緊我樣衰，但又話我可愛……ahhhh我好亂呀。」單是這條回覆，就有八百多個like。也有人說：「拿(嗱)~黃錦星，呢鋪我就撐你啦！」他便答：「睇真啲，係我嚟㗎！！係我大嘥鬼呀！！識咗大家咁耐，你哋仲搞錯，我好失望囉。」到底回覆有冇準則？有冇辦公時間？Rebecca說：「有啲問題唔應該由大嘥鬼答，就不會答。見到有人提問，即使三更半夜，會好似見到WhatsApp咁，唔覆唔自在。」越多人留言，越容易吸非粉絲click入專頁睇帖文，維持專頁人氣。
俾人話似卡通版黃錦星
兩年前面世的大嘥鬼，由構思設計至日後經營，環保署都放手交給adbrownies處理。宣傳短片導演王嘉明說：「他們有給我們自由度創作，尤其facebook的帖文及留言回覆。最多只是打個電話傾兩句，便可落手做。」如果要經過重重政府關卡批核，事件攤凍，再出帖文只會被譏old news is so exciting。
團隊當初設計十多款不同造形的大嘥鬼，最後落實用現在的「卡通版黃錦星」。王嘉明笑說：「真的似局長嗎？我們設計時冇參考任何人物，只是美麗的誤會。」其實仲有人覺得似阿里巴巴個爸爸馬雲。大嘥鬼明明是個浪費的角色，偏偏他又唔太乞人憎，「他的角色設定像你身邊有壞習慣的朋友，有點囂，柯打完一枱菜又食唔晒，但不至於似以往的垃圾蟲，人人想追打。」心裏心裏有個謎，宣傳海報上的大嘥鬼忽男忽女忽細路，點解嘅點解嘅？原來構思時特意不為他定性別年紀，「就是希望靈活一點，不同場合有不同造形。」加鬚可以扮爸爸、加圍裙又可扮阿媽，加頂偵探帽又可自稱「福爾摩嘥」。形象百變的大嘥鬼次次有驚喜，但其他官方卡通人物似乎冇咁好彩……
大嘥鬼 你答我！
問：對於近日鬼氣急升，有甚麼感想？
答：嗱，我就一定唔會認我暗爽自high咗幾晚冇瞓覺。
問：人人都話你似冇戴眼鏡的局長黃錦星，你有甚麼感想？
答：我覺得大家就真係要戴番眼鏡囉，唔似喎真係。
問：有冇因為頭大身細而仆親？
答：我次次出活動都又唱歌又跳舞，好明顯係身手靈活嗰批啦。
品評歷代官方吉祥物
香港理工大學設計學院高級專任導師曾錦程，是當年哄動一時的Sunday電訊廣告創作人。他提到政府如想借用卡通達到宣傳效果，必先給予充足資源。「最緊要係放手。」對歷代官方卡通，他逐一品評。
搶眼：垃圾蟲（清潔香港）
七十年代，用卡通作宣傳並不普遍。紅撞綠造型搶眼。奸角形象夠立體，能吸引注意，因為人總是喜歡看負面東西。
呆板：清潔龍（清潔香港）
太正常，太正面，太正經。
賤格：大嘥鬼（惜食香港）
造型不俗，因為醜陋，所以突出。他可以更賤格，凸顯浪費本色，可參考Mr. Bean，他將人類陋習集於一身，夠啜核。
失敗：小芽菜（家是香港）
活力、關愛等主題太普通。四個吉祥物出自三名設計師，東拼西湊。完全失敗，一點noise也沒有。
複雜：積積樂隊（強積金）
外表不討好，性格不鮮明，故事太複雜。每隻公仔的訊息量太多，觀眾難以消化。應把它們人性化，賦予個性。
記者：葉青霞
攝影：徐振國、伍慶泉、黃子偉
編輯：黃子卓
美術：吳子豪