作為香港人，相信唔少人同八方一樣，天時暑熱返到屋企，第一時間梗係開着個冷氣，最後就畀電費單嘅銀碼嚇到飛起，但環境局局長黃錦星卻有驚人耐熱度，佢噚日出席一活動時，分享喺屋企嘅獨門節能經驗。
佢以自己4人家庭為例，話每個月只係交120蚊電費咋，換言之每個成員嘅電費每月只係30蚊，畀港島區人均用電量160度都低好多喎。八方去過港燈網用電費計算機（家庭供電）計過，160度電費加燃料價條款調整盛惠$150.67。
究竟點樣可以慳到咁多電？星爺自爆屋企原來有條家規，規定只有喺氣溫高過28℃，屋企人先至可以喺瞓覺時開冷氣（記住，係瞓覺時咋、冇話平時都開得），最絕嘅一招係，佢每個月都會將電費單email畀屋企人，呢次星爺一定會獲大嘥鬼送like咯。