「我要真普選」徹夜懸掛喺獅子山之巔，激起後雨傘時代創作團體「學舌鳥Mocking Jer」向匿名者「蜘蛛仔」致敬嘅心。短片《激戰獅子山》籌備半年，演員親自學攀石，並到獅子山實地取景，希望喺政改表決前重新喚起所有人當初遙望banner嘅感動；以電影方式記錄大時代片段，無非想用本土電影講本土嘅事，12號會喺YouTube播出。
電影《激戰》中嘅主角賤輝為理想苦練MMA技術，學舌鳥成員阿修都為咗呢套戲學攀石。一邊做嘢一邊兼顧拍攝，初哥阿修只有短短5日學習時間，面對難度達「五級」嘅獅子山，佢話稱「淨係諗要爬上去都手心出汗」。本來想借位拍攝，但為求逼真就抱住即管一試心態，最終喺教練陪同下完成，「我哋就話日頭拍啫，但蜘蛛仔喺夜晚掛上去，真係好佩服佢哋」。
王宗堯友情客串
要拍出網絡影片難得一見嘅鏡頭，全靠背後一眾攀石教練團。導演阿天話本來構思係以特技加工完成，「但早排拍嘢咁啱識到個攀石教練，同佢講開，點知一呼百應」。意外地獲專業教練義務配合，由喺攀石場協助練習，到登上獅子山時幫忙搬運沉重器材，均全力支援。
《激戰獅子山》製作團隊前後共50人，阿天話所有人都係義務幫忙，「邊個得閒就邊個做」，單係攝影師就有3個，最大型一幕更出動30個臨時演員，「全部都係網上叫網友幫手」，而眾人男神王宗堯更一口答應友情客串。負責寫劇本嘅阿修就話掛banner係「必殺技」，「將真普選同獅子山掛鈎，帶出獅子山精神，真係太屈機」。
李八方
mailto:[email protected]